Misis - Ginang

MISIS - GINANG

dalawang krosword, iisang petsa

sa dalawang dyaryong magkaiba

Una Pababa doon sa una

at Una Pahalang sa isa pa

dalawang krosword, iisang tanong

na kayang sagutin ng marunong

tanong ay Misis, ano ang tugon

anim na titik at GINANG iyon

dalawang dyaryo kong sinagutan

nang si misis ay binabantayan

habang kami'y nasa pagamutan

matapos niyang maoperahan

krosword ay nasagutang malinis

habang nagpapagaling si misis

pagkat siya roon ay tinistis

sa sakit na kaytagal tiniis

- gregoriovbituinjr.

10.29.2024

* krosword na may petsang Oktubre 29, 2024 mula sa pahayagang Abante Tonite, p.7, at pahayagang Bulgar, p.13