KAPE MUNA
kaibigan, ikaw ba'y pasaan?
ha? sa isang malayong lakbayan?
ay, magkape muna tayo, igan
tila baga maaga pa naman
tara, ako muna'y saluhan mo
at pag-usapan natin ang isyu
ng kalikasan, dukha't obrero
ang bilihing kaytaas ng presyo
o marahil ang buhay pamilya
ang anak mo ba'y nag-aaral na?
mayroon ka na bang bisikleta?
sweldo'y kaybaba na, kontraktwal pa?
ha? paano ang tamang diskarte?
nang sahod ninyo'y lumaki-laki?
daan muna't tumikim ng kape
pag-usapan natin iyan dine
- gregoriovbituinjr.
02.08.2024
Walang komento:
Mag-post ng isang Komento