Miyerkules, Hunyo 29, 2022

Habambuhay

HABAMBUHAY

patuloy ang paghagod ng pluma't 
tinta sa papel, upang isulat
ang dighay, lumbay, danas ng masa
mula puso'y isinisiwalat

ang maraming isyu't panunuyo
ng lalamunang walang masambit
nilalahad din ang panunuyo
sa diwatang sadyang anong rikit

tungkulin na iyong habambuhay
na niyakap ng abang makata
na patuloy yaong pagninilay
kaharap man ay matinding sigwa

sinasatitik ang dusa't danas
ng maralita't uring obrero
hinahangad ay sistemang patas
patungong lipunang makatao

habambuhay na ang adhikaing
niyakap ng may buong paghamon
pagsasaliksik ay sinisinsin
adhika'y kaaya-ayang panahon

- gregoriovbituinjr.
06.29.2022

Walang komento:

Mag-post ng isang Komento

Munting aklat ng salin

MUNTING AKLAT NG SALIN di pa ako umaabot na magpalimos kaya nagbebenta ng munting gawang aklat pultaym na tibak ay pulos diskarteng lubos da...