EXCHANGE GIFT
katatapos lamang ng masigabong pagdiriwang
bawat isa sa kanila'y may pangregalo naman
ano kayang matatanggap mula sa kapalitan
sana'y bagay naman sa iyo't iyong magustuhan
hanggang isang larawan ang nakapukaw sa isip
na pag pinagmasdan mo'y iyo agad malilirip
inaalay ng puno'y anong gandang halukipkip
habang ang tao'y kasamaang walang kahulilip
mabuti pa ang isa'y bunga ng kanyang paggawa
habang ang isa naman ay palakol na hinasa
hanggang sa pagdiriwang ba naman ay may kuhila
parang tunggaliang kapitalista't manggagawa
bakit puputlin ang punong nagbibigay ng prutas
kundi upang tumubong limpak-limpak ang pangahas
nais laging manlamang, sa kapwa'y di pumarehas
ah, paano ba kakamtin ang makataong landas
maiiwasan ba natin ang mga tusong imbi
na nais kumita ng milyon, perang anong laki
kung magbigayan sana'y para sa ikabubuti
ng kapwa, tanda ng pagkatao, di pangsarili
- gregoriovbituinjr.
01.11.2022
* litrato mula sa google
Walang komento:
Mag-post ng isang Komento