Kalatas sa aking mga apo, Liham 1

KALATAS SA AKING MGA APO, LIHAM 1

mabuhay kayo, mga apo ko, apo sa tuhod

at talampakan, ako'y nagsisipag sa pagkayod

upang magandang kinabukasan ay itaguyod

pagsulpot ninyo sa mundong ito'y nakalulugod

ang payo ko lang, apo, mag-aral kayong mabuti

basahin ang inyong aralin sa araw at gabi

magtapos kayo't paghandaan ang inyong paglaki

kolehiyo'y tapusin upang di kayo magsisi

basahin din ang Liwanag at Dilim ni Jacinto

na nagsabing "lahat ay iisa ang pagkatao"

ang Kartilya ng Katipunan ay basahin ninyo

at isabuhay tulad ng isang Katipunero

sa mga iyan pakikipagkapwa'y nasusulat

sa pagpapakatao't mabuting asal mamulat

sa bansang ito puso't diwa ninyo'y nakaugat

tinubuang lupang dapat ipagtanggol ng lahat

may mga tungkulin din kayo bilang mamamayan

na pag-aralan ninyo ang takbo nitong lipunan

bakit laksa'y naghihirap, may mayamang iilan

kongkretong pagsusuri sa kongkretong kalagayan

magulang nyo'y igalang at sundin ng buong puso

mga apo, sana'y di n'yo danasin ang siphayo

munting hiyas lang ng karanasan ang aking payo

upang problema'y malutas ninyong di sumusuko

- mula kay Tata Goryo Bituin

06.06.2036